Milli Məclisin deputatı Hikmət Babaoğlu: Fransa ATƏT-in Minsk qrupunun həmsədrliyindən istefa verməlidir

“Azərbaycan Ordusunun Ermənistan tərəfindən işğal edilmiş ərazilərimizi azad etməsi istiqamətində həyata keçirdiyi əməliyyatlar beynəlxalq hüququn təminatçısı qismində çıxış etməli olan ATƏT-in Minsk qrupunun həmsədr ölkəsi Fransada qeyri-adekvat reaksiya doğurub”. Bunu SİA-ya “Yeni Azərbaycan” qəzetinin baş redaktoru, Milli Məclisin deputatı Hikmət Babaoğlu deyib.
Hikmət Babaoğlunun sözlərinə görə, uzun illərdir, problemin həlli üçün BMT Təhlükəsizlik Şurasından mandat almış və missiyası münaqişəni sülh yolu ilə həll etmək olan bu həmsədr ölkə ötən dövr ərzində heç bir real addım atmayıb: “İndi isə Fransa münaqişənin həlli istiqamətində real addımlar atıldıqda və beynəlxalq hüququn tətbiqi ilə bağlı Azərbaycan öz suveren hüququndan istifadə etdikdə tərəf kimi çıxış etməyə başladı. Bəlli oldu ki, ötən müddət ərzində ATƏT-in Minsk qrupunun uğursuzluqlarının əsasında məhz Fransanın davranışları durur. Bu gün Fransa işğalçı ölkənin müttəfiqi kimi çıxış etməklə problemin həllinə maneçilik törədir. E.Makronun etdiyi çağırışlar bir daha sübut edir ki, Fransa Ermənistan-Azərbaycan Dağlıq Qarabağ münaqişəsinin həlli məsələsinə münasibətdə neytrallığını itirib, ona görə də dərhal həmsədrlikdən istefa verməlidir, ya da Minsk qrupu institutu onun ATƏT-in Minsk qrupunun həmsədrliyindən uzaqlaşdırılması ilə bağlı dərhal qəti addımlar atmalıdır. Sərgilənən bu cür mövqe Fransa Prezidenti Emmanuel Makronun timsalında bu ölkədə beynəlxalq hüquqa münasibətdə ikili standartların tətbiq olunduğunun göstəricisidir və beynəlxalq hüququn tələblərini qəbul edə bilməyən bir ölkənin bundan sonra ATƏT-in Minsk qrupunun həmsədrlərindən olmağa mənəvi haqqı yoxdur. Ona görə də işğalçı ölkə tərəfindən çıxış edən Fransanın mütləq prosesdən uzaqlaşdırılması beynəlxalq hüququn və sabitliyin təmin olunması üçün vacib şərt kimi ortaya çıxıb”.